Dogana e Kosovës ka ndaluar një rast të tentativës për mashtrim me origjinën e mallit nga një subjekt ekonomik që ka tentuar të importojë pleh kimik me origjinë nga Federata Ruse, duke e paraqitur atë si produkt me origjinë nga Serbia.
Dogana njofton se “Kompania paraprakisht kishte marrë përgjigje negative me shkrim nga Dogana e Kosovës se importi i këtij produkti ndalohet për shkak të sanksioneve ndaj Federatës Ruse, derisa subjekti ka vazhduar me tentativën për të kamufluar origjinën duke ambalazhuar paraprakisht mallin me thasë që mbanin emërtimin e një prodhuesi nga Serbia”.
Dogana ka ndërhyrë me kohë dhe ka ndaluar dërgesat të këtij malli në momentin e hyrjes në Republikën e Kosovës. Me Aktvendim të kundërvajtjes, palës i është urdhëruar kthimi i menjëhershëm i mallit jashtë territorit të Republikës së Kosovës.
Në njoftimin e bërë për media thuhet se ky rast paraqet një sukses të Doganës së Kosovës në zbatimin efektiv të sanksioneve ndërkombëtare ndaj Federatës Ruse, në përputhje me vendimet e miratuara nga Qeveria e Republikës së Kosovës.
“Dogana e Kosovës mbetet e përkushtuar në ruajtjen e integritetit të tregtisë dhe në zbatimin e masave ndëshkuese ndërkombëtare, duke parandaluar çdo përpjekje për shmangie apo manipulim të rregullave dhe ligjeve në fuqi”, thuhet në njoftimin e Doganës./Telegrafi/
