Në atmosferë solidariteti e përkushtimi, Zyra për Barazi Gjinore në kuadër të Komunës së Klinës hapi sot zyrtarisht fushatën ndërkombëtare “16 Ditët e Aktivizmit kundër Dhunës në Bazë Gjinore”.
Në hapjen e këtij aktiviteti morën pjesë nënkryetarja e Komunës së Klinës, znj. Marqe Tanushi Selmanaj, dhe zyrtarja për barazi gjinore, znj. Vitore Shala, të cilat theksuan rëndësinë e bashkëpunimit ndërinstitucional dhe angazhimit të përbashkët në luftën kundër dhunës në familje.
Në këtë ngjarje morën pjesë edhe gra nga institucione komunale dhe përfaqësuese të shoqërisë civile, të cilat me praninë e tyre dërguan një mesazh të fortë për barazi, respekt dhe mbështetje ndaj grave dhe vajzave.
Pas takimit, pjesëmarrëset zhvilluan një parakalim simbolik në rrugët e qytetit të Klinës, duke bartur pankarta me mesazhe ndërgjegjësuese për parandalimin e dhunës dhe fuqizimin e grave në komunitet.
Ky aktivitet, i organizuar nga Zyra për Barazi Gjinore në bashkëpunim me Komunën e Klinës, shënon fillimin e një sërë ngjarjesh që do të zhvillohen gjatë 16 ditëve të ardhshme, me qëllim rritjen e vetëdijes qytetare dhe mbrojtjen e të drejtave të njeriut.
