Nuk ka dyshim se Martin Christensen Braithwaite, është një lloj tjetër futbollisti. Ish-lojtari i Leganes, Barcelona dhe Espanyol, tani i Gremio në Brazil, fiton më shumë jashtë fushës sesa brenda.
Ai është një biznesmen i suksesshëm në sektorin e pasurive të paluajtshme: pasuria e tij familjare – ai ndan një kompani me xhaxhanë e tij – vlerësohet në 230 milionë euro.
“Bleva shtëpinë time të parë në 22 vjeç në Francë dhe kuptova se duhej ta rrisja vlerën e saj dhe ta ktheja në një pasuri. Çdo karrierë në futboll ka një fund dhe mua më pëlqen t’i siguroj financat e mia me të ardhura pasive. Kur xhaxhai im u fut në biznesin e pasurive të paluajtshme, ishte e natyrshme për mua të hidhesha në atë botë” deklaroi ai.
Karriera e tij gjithashtu ka qenë atipike. Lëndimi afatgjatë i Dembeles i lejoi Barcelonës të paguante klauzolën e tij të lirimit prej 18 milionë euro dhe të nënshkruante jashtë afatit sulmuesin e atëhershëm të Leganés – në mes të shkurtit . Një rregull që më pas u shfuqizua nga Federata.
Reprezentuesi danez kaloi nga Barcelona te Espanyol në vitin 2022 dhe, pavarësisht rënies, mbeti në Kategorinë e Dytë. Në fakt, sezonin e kaluar ai drejtoi rikthimin e ‘pericos’ në Kategorinë e Parë, duke u bërë golashënuesi më i mirë me 22 gola.
Në gusht, madje pati zëra se Braithwaite po kërkonte mënyra për të blerë klubin e Espanyolit. Megjithatë, kontrata e tij po përfundonte, dhe ai bëri një ndryshim rrënjësor në karrierën e tij: “Më mungon Spanja, por ishte koha për një ndryshim peizazhi dhe diçka ndryshe”.
Ish-lojtari 33-vjeçar i Leganes, Barcelona dhe Espanyol nënshkroi për Gremio, duke u bërë futbollisti i parë danez që luan në Brasileirao. Që atëherë ai nuk ka bërë keq: ka 16 gola dhe tre asistime në 32 ndeshjet që ka luajtur me skuadrën nga Porto Alegre.
Tani ai ka bërë sërish histori. Braithwaite është bërë danezi i parë që shënon në historinë e Copa Sudamericana, ‘motra e vogël’ e Libertadores. Këtë e bëri, për më tepër, në debutimin e tij për t’i dhënë fitoren Gremios në vizitën e tyre te Sportivo Luqueño (1-2).
Danezi shënoi me kokë pas një krosimi nga e djathta nga Cristian Olivera për të shënuar për 1-2 .
“I gëzuar që u ktheva, fitore e rëndësishme”, ka shkruar ai në llogarinë e tij në Instagram.
Megjithatë, jo gjithçka ishte mirë. Braithwaite, që u kthye nga lëndimi, ktheu kyçin e këmbës në një duel ajror dhe “përfundoi me dhimbje”, ku trajneri i tij, Gustavo Quinteros, deklaroi pas ndeshjes se “shpresoj se nuk është asgjë e madhe”. /Telegrafi/
