Klinë — Zhvillimi ekonomik është një nga shtyllat kryesore të programit qeverisës të kandidatit për kryetar të Komunës së Klinës, Sokol Bashota. Ai ka theksuar se në mandatin e ri, përkrahja për bizneset lokale dhe të huaja do të jetë prioritet, duke krijuar një ambient të favorshëm për investime dhe hapjen e vendeve të reja të punës.
“Në mandatin e ri, do të jemi partner i vërtetë i çdo biznesi që dëshiron të investojë e të zhvillohet në Klinë. Ekonomia e fortë është garanci për një Klinë të zhvilluar,” deklaroi Bashota gjatë një vizite në njërën nga fabrikat më të suksesshme në vend, “Agrobutrinti”.
Fabrika “Agrobutrinti” është lidere në tregun vendor në prodhimin dhe instalimin e mbështjellësve të ndërtesave, dyerve, dritareve, fasadave me xham dhe konstruksioneve prej çeliku. Vizita e Bashotës në këtë biznes është pjesë e angazhimit të tij për të dëgjuar dhe mbështetur nevojat e sektorit privat.
Bashota potencoi se përmes politikave të qarta zhvillimore dhe partneriteteve me bizneset, Klinës do t’i jepet një hov i ri ekonomik, duke krijuar kushte më të mira për investitorë dhe qytetarë.
