Partia Demokratike e Kosovës (PDK) ka mbajtur sonte tubimin elektoral në qytetin e Klinës, në kuadër të fushatës zgjedhore për zgjedhjet lokale.
Tubimi u zhvillua në Qendrën e Kulturës “Jehona e Dukagjinit”, ku morën pjesë qindra qytetarë, struktura të degës lokale të PDK-së, si dhe drejtues të lartë të partisë.
Në këtë ngjarje mori pjesë edhe kryetari i PDK-së, Memli Krasniqi, i cili theksoi se Klinës i duhet një rikthim i fuqishëm drejt zhvillimit, duke vlerësuar përvojën dhe angazhimin e kandidatit për kryetar, Sokol Bashota.
Ai u shpreh se PDK mbetet alternativa më e besueshme për ta çuar përpara komunën dhe vendin.
Kandidati për kryetar të Klinës, Sokol Bashota, falënderoi qytetarët për pjesëmarrjen dhe mbështetjen, duke u zotuar për projekte konkrete në zhvillimin ekonomik, infrastrukturë dhe shërbime më cilësore për qytetarët.
Ai theksoi se bashkë me ekipin e tij do të rikthejnë dinamikën e punës dhe përkushtimit që Klinës i ka munguar viteve të fundit.
Tubimi u mbyll në atmosferë entuziazmi, me thirrje për unitet dhe mobilizim të votuesve të PDK-së në ditët e fundit të fushatës.
