Klinë, 7 nëntor 2025 — Lëvizja VETËVENDOSJE! në Klinë ka reaguar ashpër ndaj një koalicioni të ri, të cilin e cilëson si “të turpshëm” dhe të ndërtuar vetëm mbi interesa personale. Në një njoftim zyrtar, Qendra e Lëvizjes në Klinë thekson se ky grup individësh nuk përfaqëson idetë dhe vlerat e VETËVENDOSJE!-s, por “vetëm vetveten dhe ambiciet e tyre të ulëta”.
Sipas njoftimit, personat në fjalë “kanë punuar prej kohësh për ta dëmtuar dhe përçarë qendrën” dhe tani “po përpiqen ta shfrytëzojnë emrin e Lëvizjes për pazare e përfitime personale”.
“Kësaj here gjithçka është e qartë: këta njerëz s’kanë as moral politik, as ndershmëri, as lidhje me idealin për të cilin ne punojmë çdo ditë,” — thuhet në reagim.
Në deklaratë, Lëvizja i krahason këta individë me “një PSD të dytë”, duke thënë se, ashtu si ata që dikur tentuan të dëmtonin Lëvizjen nga brenda, “edhe këta do të kenë të njëjtin fat, sepse qytetarët e Klinës i njohin mirë dhe nuk mashtrohen më.”
VETËVENDOSJE! Klinë rithekson se nuk udhëhiqet nga pazaret politike, por nga parimet dhe ideali për drejtësi e barazi.
“Ne nuk punojmë për karrige, por për drejtësi dhe barazi. Dhe askush, sado i zhurmshëm të jetë, nuk mund ta ndalë këtë,” — thuhet më tej në reagim.
Në fund, Qendra njofton se do të hapen procedura disiplinore ndaj personave të përfshirë dhe se do të ndërmerren “të gjitha veprimet e nevojshme sipas statuteve dhe rregullave të Lëvizjes”.
Lëvizja VETËVENDOSJE! – Qendra Klinë
