Në Klinë u mbajt një takim i jashtëzakonshëm i organizuar nga Forumi i Gruas Demokratik, ku morën pjesë qindra gra të vendosura për të dhënë kontributin e tyre në ndryshimet e mëdha që po vijnë.
Tubimi u vlerësua si dëshmi e fuqisë dhe rolit të gruas në shoqëri, duke theksuar se pa gruan nuk ka zhvillim të drejtë, shoqëri të shëndoshë apo të ardhme të sigurt.
Në fjalën e tij, kryetari i Degës së PDK-së në Klinë dhe kandidati për kryetar të komunës, Sokol Bashota, tha:
“Ashtu siç e kam bërë listën për Kuvendin e Komunës me gati 50% gra, ashtu nesër pas fitores do ta bëj edhe ekzekutivin.”
Ai theksoi se ky është zotim i qartë për të garantuar vendin që gratë e Klinës meritojnë në vendimmarrje dhe drejtimin e komunës.
Në këtë ngjarje morën pjesë edhe deputetet e Kuvendit të Kosovës, Vlora Çitaku, Blerta Deliu, Ganimete Musliu, Ariana Shoshi, si dhe Valdete Idrizi e Safete Hadërgjonaj, të cilat me fjalët e tyre frymëzuese dhanë kurajë dhe besim për rrugëtimin politik të grave të Klinës.
Energjia, përkushtimi dhe vizioni i grave të Forumit u cilësuan si forca lëvizëse e ndryshimit dhe garanci se politika lokale do të ketë gjithmonë mençurinë e nënave, motrave dhe bijave.
