Një konflikt i rëndë familjar ka eskaluar në kanosje dhe sulm fizik në Istog, ku një person ka përfunduar në ndalim policor, raporton Gazeta Sinjali.
Ngjarja ka ndodhur më 7 prill 2026, rreth orës 22:00, në rrugën “Edit Durham”, ku i dyshuari I. I. dyshohet se ka kanosur dhe sulmuar familjarët e tij.
Sipas burimeve të Sinjalit, i dyshuari, i cili jeton dhe punon në diasporë, kishte ardhur disa ditë më parë në shtëpi dhe gjatë një debati për çështje pronësore, ka kërkuar nga familjarët që të largohen nga banesa.
Situata ka eskaluar kur ai i është drejtuar vëllait me fjalët kërcënuese: “Ose lëshoma shtëpinë, ose kam me ta ba si ai në Klinë që ka vra vëllai-vëllain.”
Po ashtu, sipas deklarimeve, ai dyshohet se ka goditur me këmbë në krah motrën e tij, megjithëse pa i shkaktuar lëndime të dukshme.
Palët janë shoqëruar në stacion policor, ku është konfirmuar se kanë edhe një kontest pronësor në gjykatë për të njëjtën shtëpi.
Me urdhër të Prokurorit kujdestar, ndaj të dyshuarit është iniciuar rast për “Kanosje/Sulm në kuadër të dhunës në familje” dhe i njëjti është ndaluar për 48 orë.
